مذكراتي العزيزة
كل سنة و انتي طيبة
رمضان شهر جميل ,, رتم حياتي في رمضان يختلف تماما عن رتم حياتي في غير رمضان
و اهم شئ هو تقنين متابعة التليفزيون و حصرها علي البرامج الدينية فقط زي مثلا : رحلة السعادة لـ د/ عمرو خالد , روائع التابعين لـ الشيخ محمود المصري , مدرسة الحب لـ مصطفي حسني ,,,,,, و غيرهم و دول علي سبيل الذكر و ليس الحصر
و الحمد لله لا اتابع أي مسلسل تماما
مهو عندي 326 يوم اتابع فيهم مسلسلات ما حبكتش اتابع مسلسلات في الـ 30 يوم بتوع رمضان !
بس عندي عادة غريبة جدا , كل سنة يوم ما يقولوا في الرؤية ان بكرة العيد اقوم جري علي الريموت و اقول في نفسي لما اشوف بقي اللي كانوا بيتفرجوا عليه :D
السنة دي بقي الهبل ده اشتغل من بدري
من يومين كنت زهقانة قولت لما اتفرج بسرعة كده عن الربعمية و كام قناة اللي عندنا اشوف فيهم ايه !
اول حاجة قابلتها : مسلسل "عايزة اتجوز" للرائعة غادة عبد العال
و الحقيقة انا كنت قرأت الكتاب و استمتعت جدا و انا بقرأه
و بصراحة استمتعت بالمسلسل جداا
بس للاسف ما اقتنعتش بهند صبري في الدور و حسيت تمثيلها مفتعل
و اختي بردو اتفقت معايا في كلامي و اثنت علي د/ غادة و قالتلي : المسلسل ده هيبقي انطلاقة ليها
بس ساعتها فكرت : "شوفي يا بت يا زكزوكا اختك برايد بدأت حياتها ببلوج و منه عملت كتاب و بعد الكتاب مسلسل و بتكتب في الجرانين و هي بردو من صنف الدكاترة ,, يا رب كده في يوم من الايام ابقي زيها "
قولي امين يا مذكراتي ,, اميـــــــــــن
قررت من ساعتها ان بعد رمضان هبقي اتابعها
قلبت شوية في القنوات و جت معايا قناة الحياة الحمرا و شوفت فيها : "حيلهم بينهم من الاخر "
للبتاعة اللي اسمها : انجي وجدان و معاها البتاع اللي اسمه : ادوارد
المفروض انه برنامج مقالب بين الممثلين
بيجيبوا ممثل و يقنعوه انه هيعمل مقلب في ادوارد و هو اللي هيتعمل عليه المقلب
كان في الحلقة دي : "منة فضالي" و اللي حصل بجد اثار اشمئزازي
هي فاكرة ان هي اللي بتعمل عليه المقلب فقالت كلام سخيف فهو راح معيط فهي اعدت تقوله :
- ولا يا ادوارد !
- ما تزعلش يا ولا !
- ده احنا صحاب !
- ده انا بحبك يا ولا !
و في النهاية قامت باست راسه و قالتله : مراتك هتطلقك النهاردة عشان الروج بتاعي
و لما قالها ان ده مقلب رد فعلها انها قامت تديله بالشلوت !!
و هو عشان يخفف من ثورتها راح اخدها بالحضن !!
بذمتك يا مذكراتي ده ينفع ؟
هم دول النجوم اللي المفروض الشباب بياخدهم قدوة ؟
دول ما يتقالش عليهم نجوم !
افتكر زمان ما كانش الممثل بيتقال عليه نجم ، كان اسمه مشخصاتي !!
ساعتها مسكت الريموت و دوست علي زرار البور و قررت اني ما اتفرجش علي الحاجات دي لا في رمضان و لا في غير رمضان
حاجة تقرف بصحيح
فوتك بعافية يا مذكراتي
و المشكلة انهم فاكرين نفسهم قدوااااااات !! و المشكلة الاكبر ان فى ناس فعلا واخدينهم قدوات
ردحذفياللا ربنا يهدينا و يهديهم
اسلوبك جمييييل ..
هي فعلا المشكلة مش فيهم
ردحذفهما يولعوا بجاااز
لكن المشكلة في اللي اخدينهم قدوة زي ما بتقولي كده
و شكرا علي الاطراء اللي ما استحقوش :D
وماله لما تبوسه
ردحذفوماله لما بيحضنها
إذا كان هو ده أصلا أكل عيشهم
ويرجعوا يقولوا بنمثل..!!!
يعني يا جناعه الحضن ده مش بجد ومش بحق وحقيقي ومجرد خدعه سينيمائيه ؟؟؟
يقولوا لأ هو حضن بجد بس تمثيل يعني ؟؟؟
طب تيجي إزاي دي
فعلا حاجه بقت تقرف
أعجبني أسلوبك
استمري ، ربما تصلين يوما إلى حلمك :)
تحياتي
هو علي فكرة الشعرواي كان زمان قال ان الزواج اللي بيبقي في المسلسلات ده كلنا بنبقي شاهدين ان ده اتجوز دي بجد! ,, ناس كتير ساعتها عارضت و قالت ده مجرد تمثيل و ده زواج بين شخصيات خياليه و ليست بين افراد حقيقين
ردحذفبغض النظر عن موقفي من الفتوي دي ,, بس اللي بيحصل في التليفزيون من مشاهد و مواقف مخجلة و الفاظ بذيئة لا بد له من وقفه
و اضعف الايمان ان احنا نقاطعه
شكرا علي تشجيع حضرتك يا دكتور :)