بسم الله الرحمن الرحيم
في يوم الخميس الموافق 17 من شهر يونيو عام 2010 قررت انا المدعوة - زكزوكا الأروبة - ان انشأ مدونتي الخاصة علي موقع بلوج سبوت
هو انا اقل من ان يبقي عندي مدونة ؟
و لا اللي عندهم مدونات أحسن مني فيه ؟ يكونشي عندهم صباع زيادة و لا فص في كبدهم زيادة عني ؟
زيي زيهم
زي ما عندهم بلوج يبقي انا عندي انا كمان بلوج
بس احقاقا للحق انا لا افهم شئ في تنسيق المدونات
و لا رفع الصور عليها بس انا عندي يقين انها مسألة وقت و حبقي بروفشنال
بمناسبة بروفشنال سمعتوا نكتة سواق التاكسي البروفشنال ؟
قولتولي لا
اقولهالكم انا بقي:
بيقولولك مرة واحد امريكاني نزل القاهرة و ركب مع سواق تاكسي و كان فيه اشارة حمراء و راح سواق التاكسي قطعها ، الأمريكي اتعصب و قاله انت غبي ازاي تقطع الاشارة ؟ قاله السواق : ما تخافش يا خواجة انا سواق بروفيشنال حريف سواقة و اعجبك اوي
الاشارة التانية كانت حمراء و بردو قطعها سواق التاكسي , الامريكي راح قاله : انت اكيد مجنون لا بتخاف علي نفسك و لا علي اللي معاك !
قاله السواق : يا خواجه ما تخافش انا زي ما قولتلك سواق بروفيشنال
عدو علي الاشارة الثالثة و كانت خضراء
وقف صاحب التاكسي عند الاشارة
الامريكاني اتجنن و قاله : انت اكيد مجنون ازاي الاشارة خضراء و انت تقف
قاله صاحب التاكسي :
ما تبئاش غبي يا خواجة
يمكن حد بروفيشنال جاي من هنا و لا من هنا
ربنا يستر و ما ابقاش بروفيشنال بالطريقة دي
انا ما اعرفش ازاي اقرا مدونات الناس التانية الا لما حد يديني لينك مدونته
يا ريت لو حد ربنا يجازيه عني خير يقولي ازاي اتفرج و اتابع مدونات الناس
هنا في مدونتي - مدونة زكزوكا هانم - حكتب مواقف من حياتي اليومية في صورة يوميات بأسلوب فكاهي الي حد كبير بس هيبقي في الاخر فيه غرض من الموقف
اتمني ان المدونة تعجب الناس و يا رب يبقي ليها فايدة
ليست هناك تعليقات:
إرسال تعليق