ياااااااه
علي الامتحانات !!
و سنين الامتحانات!!
و غلاسة الامتحانات !!
علاقتي بالامتحانات علاقة وثيقة
بحس انها جزء من افراد عائلتي
بقالي 12 سنة ما بعملش غير تلت حاجات بصفة دائمة و منتظمة :
- بصلي
- بنام
- بمتحن
و ده تطور تاريخي الدراسي و الامتحاني :
في البداية مع مرحلة الابتدائي كنت لا أضع في بالي اي هم للامتحانات
الامتحان جه حلو , جه وحش
ما جاش اساسا ,, مش فارق
اهم حاجة اني كنت بعمل الواجب و العب
كبرت شوية في اعدادي و بدأ برستيجي يوجعني لما اشوف حد جايب احسن مني
فبقيت بذاكر و ادح و احل كويس لمجرد اني اثبت لنفسي ان محدش احسن مني
دخلت مرحلة الثانوية الغامة و بدأ اهلي يقنعوني انهم سنتين من العمر بس اللي هذاكر و اتعب فيهم و في امتحاناتهم و ادخل الكلية اللي انا عاوزاها و اشهيص نفسي بقي
و فعلا اقتنعت بالكلام ده و زاكرت و جبت مجموع كبير
هاه ,, كده أشطة ؟
ادخل بقي طب اسنان
بيقولوا سهلة و تعد تدرس في البوأ خمس سنين لما تزهق
طب اسنان ؟ و ليه مش طب بشري ؟
يا عم طب من بوقك
بس طبعا تحت تأثير كلام الاهل و تعدادهم في مميزات طب و ان الدكتور ليه برستيج
قولتلهم لا الا برستيجي محدش له دعوه ببرستيجي
خلاص هدخل طب
بس اعملوا حسابكم المرة الجاية كلمتي مش هتنزل الأرض ابدا !!
و دخلت كلية طب
أسوأ الكوابيس و ابشعها علي الاطلاق
لأنك مش ينفع تشهيص نفسك فيها بأي حال من الاحوال و ده لعدة اسباب
اولا و ثانيا و ثالثا لحد المليون
في يوم من الايام هتبقي مسئول عن حياة شخص
و لو تهاونت لأي سبب في المذاكرة ممكن ده يأثر علي حياة حد
و الأسباب اللي بعد كده اني لما دخلت الكلية اكتشفت مصطلح جديد عليا , الا و هو :
"دكتور جامعة " : و ده من الاوائل و اتعين في المستشفي الجامعي و بيدرس للطلبة و بيبقي تبع وزارة التعليم العالي
و
"دكتور صحة" : و ده فاشل طب -مع تحفظي علي كلمة فاشل-بمعني انه ما دحش بما فيه الكفاية و ما طلعش من الاوائل و تم تعينه في وزارة الصحة و السكان
و ازاي دكاترة الجامعة بيتعالوا علي دكاترة الصحة
و بتوع الجامعة ليهم بريستيج
لاااااااااااااااااااا
انا لازم اتعين في الجامعة
تعيين في الجامعة = اوائل
اوائل = تقدير عالي
تقدير عالي= مذاكرة ليل و نهار
اهو الناس كلها ثانويتها العامة سنتين
الا انا تمن سنين
عدي منهم اربعة و ربنا يهون بالاربعة الباقيين !!
بس المشكلة بقي في امتحانات الكلية و اختلافها عن الامتحانات اللي قبلها
انك مهما تذاكر في الكلية لازم تلاقي عجايب جوه مع الورقة
غير ان فيها جزء من الامتحانات بيبقي شفوي
و ده يعتمد 90 % علي جنسك و مظهرك
يعني لو بنت هتنجح , هتنجح
لو بنت حلوة و لابسة حلو هتجيب امتياز
و لو ولد فيه احتمال كبير تسقط
بس لو ولد و لابس شيك و مامتك دعيالك بجد يبقي ان شاء الله مقبول
بمناسبة المظهر و الامتحانات
من كام يوم كنت داخلة امتحان عملي الباثولوجي "علم الامراض" و كنت يوميها مش نايمة سهرانة طول الليل بدح
فقولت ما ينفعش اروح الامتحان بمنظر العنين دي
اضبط اي حاجة
روحت ضربتي كحل اخضر مع البلوزة الخضرا و الشنطة الخضرا و الجزمة الخضرا
و رحت استنيت قدام المعمل
بت أروبة من صحابي قفشتني و قالتلي : ايه ده يا زكزوكا ده ، ايه الروقان ده ؟
قولتلها : لالا ده مش روقان ده لزوم اني لو فيه شريحة ما عرفتهاش و لا نسيت تشخيصها ابص للدكتور اللي واقف و انزل النظارة من علي عنيا و اسبله و اقوله :
"دكتور الشريحة مش واضحة "
يجي يقوم مضبطني
و انا واقفة ارغي و اتكلم و معدي ورايا معيد طول السنة حاطط نقري من نقره و بيحب يغلس عليا جدا من الاخر حاططني في دماغه باجماع من جميع الزملاء
طبعا انا صحابي عمالين يبرأولي و يقولولي يا زكزوكا اسكتي !
و انا عمالة اتكلم و هو معدي من ورا ظهري
و اكيد اكيد كلمة " اسبله " خرمت ودنه
يالهوووووووووووووووووووووووووووووووووووووي
مفيش غير ده غير اللي يعدي و انا لازم اكون بهزر
دخلت المعمل و انا حاطة وشي في الارض
حفظت شكل البلاط بلاطة بلاطة
و حتي لما كنت بخلص الشريحة و اكتب كل اللي مطلوب مني في الاجابة و ارفع عيني من علي الميكرسكوب و الاقيه بيبص عليا اقوم منزله وشي علي طول و اقول ليفتكرني بجد بنفذ الخطة الشريرة
و عدا اليوم
صحيح : لسانك حصانك ان صنته صانك و ان هنته هانك !!
و الي لقاء اخر بعد امتحانات النظري
ادعولي
فوتكو بعافية
ليست هناك تعليقات:
إرسال تعليق