يعني ايه مستشفي الجامعة ؟

يعني ايه مستشفي الجامعة ؟

يعني شعارها : "الداخل مفقود و الخارج مولود"!

يعني ايه مستشفي الجامعة ؟

يعني و احنا مروحين الساعة واحدة و نمشي فيها عشان نطلع من الباب الرئيسي لازم نشوف الأمن و هو بيتخانق مع قرايب المرضي اللي طالعين الزيارات
و ممكن تشوف الامن بيزق واحدة ست "مشهد متكرر"!

يعني ايه مستشفي الجامعة ؟

يعني الامن يعتدي بالضرب علي طالب في سنة ستة امام المرضي ، و في الاخر يتحكم عليه!

يعني ايه مستشفي الجامعة ؟

يعني ابقي قاعدة في قسم الاشعة و اشوف الصراصير بتسرح في كل مكان!!

يعني ايه مستشفي الجامعة ؟

يعني تسمع المرضي عمالة تدعي علي المسؤلين و نادر لما تشوف علي وش مريض ابتسامة!!

يعني ايه مستشفي الجامعة ؟

يعني المريض متعذب و متهان و الكل بيتعجرف عليه !!

يعني ايه مستشفي الجامعة ؟

يعني نروح نسأل علي جهاز تفتيف الحصوات عشان نشوف بيشتغل ازاي و نلاقيه بايظ بقاله سنين ,, و غيره من الاجهزة !!

يعني ايه مستشفي الجامعة ؟

يعني ستاف تمريض عاوز الحرق "الا من رحم ربي "

يعني ايه مستشفي الجامعة ؟

يعني صاحبتنا تتكسر و ناخدها المستشفي و ما نلاقيش جبس في الطوارئ !!



بعد كده لما تتكسر ابقي روح المستشفي و انت معاك جبسك


لو حد عنده تجربة مع المستشفيات الجامعة سواء جامعة قناة السويس او غيرها يتفضل يفضفض

اتمني اسمع قصص فيها تفاءول 

ازيك ؟ مخنوووق

قديما عند سؤال ابن ادم لابن ادم اخر خلقهما الله علي هذه الارض : ازيـــك ؟
كان الرد المتوقع : كويس الحمد لله , او يكتفي بقول " الحمد لله"
و هذا ان دل فيدل علي الرضا و عدم التأفف و ان كان فيه بلاوي الدنيا كلها

أما الان فيكون الجواب السخيف لمثل هذا السؤال السخيف الذي صدر من انسان اسخف :
-اوووووف مخنوق
- مكتئب
- مش طايق عيشتي
- قرفان :s
- زهأأأت

و أيضا من الممكن ان تجد أشخاص ترد و تقول لك : مكتئب و الحمد لله

هذا يدل ايضا علي القناعة

و انا اقصد بكلامي هذا داخل نطاق الكلية
لا أعلم لماذا يظن طلبة الطب انهم " المعذبون في الارض " دون غيرهم
يقارنون نفسهم بطالب التجارة او الحقوق
فيجدون في نفسهم حسرة ما بعد منها حسرة
و لا أعلم لماذا ... مش فاهمة انا ايه كمية الحقد دي ؟

طالب التجارة لا يختلف عنكم كثيرا يا اعزائي
فليدهم هموما مثل همومكم
ما هي همومكم ؟

هيا لنمسك القضية من بدايتها

طالب الطب طالب حالم توقع انه سيذاكر سنتين من عمره هما ( الثانوية الغامة ) و انا اقصد تلك الغين و ليست خطأ كتابي
و من بعد ذلك سيدخل الكلية ليعيش عيشة "هيصة" , " مترفة " لن يفتح فيها الكتاب الا ليلة الامتحان
و يجد نفسه بنادي بلقب دكتور - من بعد ظهور النتيجة مباشرة و حتي قبل التنسيق - فينشكح لوقع هذا اللقب الموسيقي الرائع علي نفسه ( مسكين يا عيني ما يعرفش اللي فيها )

فيدخل الكلية ليجد نفسه يدفع ضريبة ذلك اللقب !!

أخينا هذا همومه تتمثل في كم الكتب التي لديه و ماذا سيفعل في كمية المعلومات التي يجب ادخالها الي مخه ان عاجلا ان اجلا ( ليلة الامتحان و الحشو الدماغي اللي بيحصل ليلتها )

أكبر همه هي تلك الجملة و تلك النظرة المصاحبة لها عندما يبث همه لطالب أكبر سننا منه فيرد الاخر عليه بتلك الجملة التي لا اكره شئ مثلها في حياتي :
و هو انتو لسه شوفتوا حاجة !!

اللـــــــــــــــــــــعنة
انا مش عاوزة اشوف خلاص
لو علي الشوف مش عاوزاه

و من بعد سنوات التعليم الاكاديمي التي انهاها بشهر و نصف امتحانات " الفاينال " اعاذانا الله و اياكم من هذا اللعين
يدخل مرحلة الكيلنكال
و هو يظن ان همومه انتهت تماما
و انه خلاص هيشهيص نفسه
لن اتحدث كثيرا عن تلك المرحلة سأترك المجال لمن يعانون منها حاليا

يتخرج من الكلية ليجد اول راتب يقع بين يديه 220 جنيه
شئ رائع بجد
ليدخل بعد ذلك في طاحونة الجيش و الزواج و النكد الازلي و منه الي القبر


اما الاخر طالب التجارة او الحقوق
فانظر الي كم همومه لتعرف انك تبالغ في الحقد عليه
همومه تتمثل في كيف يصالح المزة اللي ماشي معاها و بقالها يومين مشبشباله
او في كيفية تضبيط دكتور بالدروس الخصوصية ليجعله ناجحا
او او او او .... الخ
كمية رهيبة من الهموم التي لا تعد و لا تحصي لدرجة اني لا استطيع التفكير فيها من كثرها

يتخرج ليجد له والده وسطه و يتم تعينه في بنك و يأخذ فيه بالدولار
يفكر في الزواج حين تكون انت طالب في الامتياز
فيتزوج تلك المزة اللي صالحته بعد ما عرفت انه اشتغل
اما انت يا حقود فلن تجد من حولك الا الجثث !!

اجد نفسي الان اتذكر تلك اللقطة من فيلم " وش اجرام" لمحمد هنيدي التي يقابل فيها ذلك الشحاذ الذي قرر الانتحار فينصحه محمد هنيدي بألا ينتحر و يذكر له ان لكل انسان هموم
فهو مثلا يجد ان همه ( يصحي الصبح يختار اني تي شيرت , يخرج يتفسح بالـ بي ام و لا الجاجواار .... )

و عجبي

بقلم : طالبة طب وجدت نفسها مخنوقة فقررت ان تشاطركم تلك الخنقة

ممكن نتعرف ؟

ممكن نتعرف ؟

سؤال بسيط و اجابته المفروض تبقي بسيطة "اه" او " لا " ، بس السؤال ده لما اتسأل لواحدة صاحبتنا ما كانش ردها بالبساطة دي عشان هي حست ان السؤال مش بسيط زي ما الكل بيشوفه ، اسمحولي احكيلكم قصتها بس خلوني الأول اسئلكم و هخص بسؤالي البنات عشان غالبا سؤال : ممكن نتعرف ؟ بيبقي موجه من ولد لبنت و نادر لما يبقي العكس !

كام مرة اتسألتي السؤال ده ؟ ، هاه ؟ ، ما تجاوبيش . انا عارفة اجابتك من غير ما تقوليها ، عارفة انك اتسألتي السؤال ده كتير !

صاحبتنا بردو اتسألت السؤال ده كتير سواء في الحقيقة وجها لوجه ، او في العالم الافتراضي علي الانترنت ، حاولت تتجنبه كتير ،و بالتالي في الحقيقة غيرت من شكل لبسها علشان تبعد عنها الشبهات. هي في الاول ما كانش قصدها من لبسها ان حد يجي يتعرف عليها او يتصاحب عليها ، لأ هي كانت بتلبس علي الموضة ، و هي كانت مقتنعة ان من حقها انها تلبس زي ما هي عاوزة و مش من حق اي حد يفهمها غلط بس في نفس الوقت كانت بتضايق جدا من عيون الولاد اللي كانت بتنهش في لحمها زي ما بتنهش الكلاب في العظم .

ضيقها ده تلازم مع اهداء احدي صديقاتها ليها بكتيب صغير عن "شروط الحجاب الصح" فبدأت تقرأه و تقتنع بمحتواه و تقتنع ان لحمها غالي و ما ينفعش هي ترخصه و ان ربنا كرمها و فضلها علي غيرها من غير المسلمات بحجابها فلازم تلتزم بشروطه ، و فعلا بدأت تتغير و لما غيرت لبسها حست انها عملت انجاز عظيم خصوصا ان سؤال : " ممكن نتعرف " ما بقاش يتقالها و محدش بقي يفهمها غلط ، صحيح هي كانت بتحن للبسها القديم بس هي كانت فاهمة كويس انها تحتسب ده عند ربنا بنية جهاد النفس اللي الرسول قال عنه بعد ما رجع من غزوة : " رجعنا من الجهاد الاصغر الي الجهاد الاكبر "

بالنسبة للعالم الافتراضي حاولت كتير تتجنب السؤال ده و في سبيل تحقيق ده ما بقتش تضيف ولاد علي برامج المحادثة و اكتفت انها تكلم البنات صاحبتها اللي تعرفهم بس

بعد فترة كانت نسيت فيها السؤال ده فتحت منتدي لقت مبعوتلها فيه رسالة عنوانها السؤال اللي هي طول عمرها ما بتحبوش : " ممكن نتعرف ؟ " و كان صاحب الرسالة اسمه المستعار دنجوان و كان نص الرسالة الاتي :

السلام عليكم و رحمة الله و بركاته
انا اسمي احمد و كان نفسي اتعرف علي حضرتك ممكن نتعرف؟

اسف ان كانت رسالتي ازعجت حضرتك

فكرت كتير ترد عليه ازاي ؟!
فكرت ترد و تقوله :" لا مش ممكن نتعرف "
و فكرت انها ما تردش خالص ، بس هي حست ان واجبها ناحية الولد ده انها تنصحه و خصوصا انها يهمها امره عشان مسلم زيه زيها

مسكت لوحة المفاتيح و بدأت تطبع بصوابعها الكلمات الاتية :

" و عليكم السلام و رحمة الله و بركاته
انا فكرت كتير قبل ما ارد علي حضرتك
بس ردي مش الرد المنشود
أولا :حضرتك بتقول ان اسمك احمد
يعني حضرتك مسمي علي اسم اسمي خلق الله و هو سيدنا محمد صلي الله عليه و سلم
تفتكر مين احسن : احمد و لا دنجوان ؟
اعتقد ان احمد احسن كتير عشان دنجوان ده يحمل في طياته نوايا غير سليمة
ثانيا : حضرتك ترضي ان حد يقول لأختك الصغيرة :
"ممكن نتعرف ؟ "
انا لو ولد مش هرضاها

و عشان انا مش ولد فبالتالي وجب عليا اني ما اتعرفش علي حد عشان نفسي

حضرتك هتقولي ان قصدك خير و ان فيه حاجة اسمها زمالة او صداقة شريفة بين ولد و بنت
بس انا هقول لحضرتك ان مفيش حاجة اسمها كده عشان ربنا قال :

وَلاَ مُتَّخِذَاتِ أَخْدَانٍ

و الاية دي في سورة النساء اية 25
و اخدان مفردها خدمن و هو الصديق او الرفيق
يبقي ربنا لما يأمر البنت انها تفضل عفيفة و طاهرة ، ما ينفعش ان احنا نقول صداقة شريفة بين ولد و بنت عشان ربنا قال ان مفيش
و ساعتها لازم نطيع ربنا
و اسفة ان كان ردي ازعج حضرتك

موضوع سخيف

موضوع سخيف

ما انا عارفة انه سخيف

و ايه يعني لما اتكلم في "موضوع سخيف" ؟

انت اللي غلطان انك دخلت موضوع عنوانه

"موضوع سخيف"

انا قولتلك خش موضوع سخيف ؟

و بعدين اذا كانت صاحبة الموضوع "حد سخيف"

يبقي لازم تكتب "موضوع سخيف"

الموضوع هيبقي مليان سخافة و عشان كده حطاة في قسم

السخافة و الملل

الفكاهة و المرح سابقا

الموضوع السخيف هو

:



أن أن أاااااااا
المذاكرة


مش بقولكم موضوع سخيف !!

هو اكزاكتلي مش عن المذاكرة

لا ابسلوتلي

هو عن الناس اللي بتذاكر

اكزاكتلي اكزاكتلي

مش عن كل الناس اللي بتذاكر

عن فئة خاصة و هي :

الناس الخبيثة اللي بتذاكر


و مور سباسيفك يعني


البنات الخبيثة اللي بتذاكر




اعذروني يا بنات فعلي الرغم دائما من حرصي ان انا ما ابينش الحقيقة بس انا خلاص تعبت

و لازمن و لا بد اقولها

السر وجعني خلااااااص

و طبعا بما اني بقالي 16 سنة من ساعة ما اتولدت ( محدش يعد ورايا )

بعمل تلت حاجات بطريقة روتينية

- بصلي

- بنام

- بذاكر و امتحن

فصلتي بالمذاكرة صلة وثيقة

بحسها كده اختشي الصغيرة

و ده طبعا من حرص الناس و سؤالهم الدائم المستمر الملح عن المذاكرة

ارد علي التليفون
: ازيك يا ايناس ؟ اخبار المذاكرة ايه ؟

بابا يشوفني خارجة من الزنزانة
عفوا الاودة اللي بذاكر فيها :

انتي مش بتذاكري ليه ؟



وصلت لعامل النظافة

ايــــــــــــــــــون

انتو مش مصدقني ، ده اللي بيحصل ريلي

افتحله باب الشقة :
ازيك يا دكتورة ؟ اخبار المذاكرة ايه ؟




و طبعا الموضوع مش مقتصر علي الناس دي بس !!

يا سلام بقي لما نروح الكلية

و علي فكرة الموضوع مش في الكلية بس ده موضوع قديم قد الازل

من ايام المدرسة :
"تقولوش البت كانت في المدرسة من ايام حتشبسوسو "

و طبعا بما اني كنت في مدرسة رائعة الا و هي اربعة و عشرين اكتوبر

و اللي طول عمري نفسي افهم اشمعني اربعة و عشرين

ليه ما تكونش مثلا : مدرسة "عشرة اكتوبر ؟"

و ده مش عشان عشرة اكتوبر عيد ميلادي

بغض الجزر عن انه عيد ميلادي و المفروض الدولة تديه عيد رسمي

بس ليه 24 ؟

ام هند , تلاقي البنات متجمعين مع بعض و نازلين بوس في بعض و لا كأنهم كانوا شايفين بعض امبارح

و كلهم ما شاء الله يعني بنظارات من كتر ما عنيهم اتمققت في الكتب

و بعد السؤال عن الصحة و الاحوال يتسأل سؤال المذاكرة

"أخبار المذاكرة ايه ؟"

تلاقي كل واحدة فيهم اتكهربت و ركبها عفريت

س : ياااه انا بقالي كتير ما فتحتش الكتب

نعم ؟ امال مين اللي كان سهران علي المذاكرة امبارح ؟!

ش : اوووه لا انا مش بذاكر خالص انا بسهر اتفرج علي التي في

نعم ؟ و عنيكي الحمرا دي من التي في بردو و لا من السهر علي الكتاب !

إ : انا ما بتكلمش في الحاجات دي

تقولشي المذاكرة بقت مصنفة من الحاجات القبيحة دلؤتي !!

و ساعة النتيجة من كلامهم الواحد بيتوقع بقي انهم هيبقي الاواخر

تبص تلاقي الاوائل س ، ش ، إ

طيب عقلانيا لو ما بتذاكريش بتطلعي ازاي يا اختشي من الاوائل ؟

نفسي اعرف السر الختشير دي !!

و دخلت الجامعة و تكررت نفس المواقف و نفس الحركات القرعة اللي عمل ما شعرها هيطول
ابدا و هتفضل طول عمرها قرعة

نيجي بقي للولاد ، يا سلاااام

مفيش ولد بيسأل ولد عن المذاكرة كل همهم اللعب و الكورة و المذاكرة ده شئ ثانوي

نسيت حاجة مهمة جدا البنات متخصصة فيها ألا و هي : "الزونب"

في فترة حياتي اللي عيشتها , ايون الستاشر تمناشر سنة دول اخدت كمية زونب لا تعد و لا
تحصي

المشكلة بقي ان 100 % منهم كانو من البنات

يعني صاحبتك حبيبتك هي اول واحدة بتديكي زونبة

و كمان بيبقي عليها اوفر

" اتفقعلك زونبة و التانية هدية عليها "

علي نظام ماي واي و اورفليم و بقية شركات البيع المباشر و عرضوهم علي البرفانات اشتري واحد وخد التاني هدية

نفسي افهم ليه بيعملوا كده ؟!!

و انا مش هنكر مثلا اني ما عملتش كده

اعتقد بقي ان السبب هو حاجة لا ارادية سببها جين علي

X- chromosome

و اكيد المرض ده

Recessive

عشان كده ما بيبانش غير في حالات البنات

XX

و للاسف ما بتبانش علي الولاد

ان شاء الله لما ابقي دكتورة وراثة كده هكتشف الجين ده و اسميه

Zonba gene

كل سخافة و انتم طيبين

و عام دراسي سخيف علينا و عليكم

فوتكم بعافية

حاجة غريبة

السلام عليكم و رحمة الله و بركاته

ياااه حاجة غريبة خالص

مش عارفة ليه ما بفتكرش ان عندي مدونة و عاوزة اكتب عليها غير ايام المذاكرة

بجد حاجة غريبة فعلا

تعتقدي يا مذكراتي ان ده تهرب من المذاكرة ؟

و لا مثلا اعتقادا مني ان المدونات دي شئ فاشل اكمني ما بفهملهاش

و لسه ما وصلتش للبروفيشنال اللي كنت فاكرة نفسي هوصله بصباع رجلي الصغير

بس بصراحة انا مش عارفة احدد السبب

يمكن مثلا اني بحب اكتب في المنتديات عشان بلاقي ردود كتيرة مشجعة

لكن هنا مش بعرف اروح لحد و لا حد يجيلي بحس اني تايهة

 

لذلك قررت اني اجمع كل اللي بكتبه و احطه هنا في المدونة عشان يبقي محطوط عليها حقوق الملكية الفكرية الخاصة بيا

بس هو الفكرة ان فيه شوية مواضيع هتبقي مش متماشية مع غرض المدونة و هو كتابة مواضيع علي شكل مذكرات

بس يلا مش مشكلة

مذكراتي بقي و تستحمليني :D

الواحد بردو مالوش غير مدونته لحسن في اي لحظة يتكرش من اي منتدي

يلا فوتك بعافية يا مذكراتي عقبال ما اروح اجمع اللي كتبته في المنتديات و اجيبه هنا